Sali Berisha ka ironizuar para gazetarëve ish-avokatin e shtetit që i caktoi GJKKO, Artan Simoni, i cili më pas u zëvendësua nga dy kolege të tij.
Madje, kur i kanë përmendur emrin e tij, Berisha ka shpërthyer në të qeshura.
“Kushtetuta dhe vetëm Kushtetuta, e patë kush ishte fytyra e vërtetë e tyre. Nuk kam asnjë njoftim për caktimin e dy avokatëve. Avokati? Ishte….e patë ju kush ishte. Fytyra e vërtetë e tyre. Ai ishte… (qesh). Ishte ekzemplari më i shkëlqyer për Edi Ramën.”, tha Berisha.
Ditën e djeshme, menjëherë sapo gjykata caktoi Simonin si avokat kryesisht për Berishën pas largimit nga seanca të dy avokatëve të tij, në rrjetet sociale nisi të qarkullonte një status i Simonit që mendohet se i referohet Berishës.
“Bisha është plakur, bisha është lodhur, bisha s’mundet më. Shumë prej atyre që dikur bisha mbante mbi kurriz, pas kurrizit kanë filluar ta çukasin. Ku gaboi bisha?!” – ishte statusi i Artan Simonit.
