Një ngjarje tragjike ka tronditur fshatin Mjedë në Vau Dejës, ku një fëmijë 3-vjeçar ka ndërruar jetë, ndërsa motra e tij 7-vjeçare ndodhet në gjendje kritike në spitalin e Tiranës.
I mituri është paraqitur në spital me shenja të helmimit, por për shkak të gjendjes së rëndë, mjekët e kanë dërguar në repartin e reanimacionit ku pas pak ka ndërruar jetë.
Ndërkohë, motra e tij 7-vjeçare ka shfaqur simptoma të ngjashme dhe është transportuar menjëherë drejt spitalit në Tiranë për trajtim më të specializuar, raporton Top Channel.
E mitura ndodhet në gjendje kritike, ndërsa mjekët po bëjnë të pamundurën për ta shpëtuar. Shkaqet e kësaj tragjedie mbeten ende të paqarta.
Mjekët e Shkodrës thonë se kemi të bëjmë me helmim në gjak ndërkohë analizat janë nisur për në repartin e toksikologjisë në Tiranë ku do të zhvillohen hetimet.
