Kreu i Kuvendit, Niko Peleshi ka firmosur urdhrin që më 28 janar të mblidhet Këshilli i Mandateve për të shqyrtuar imunitetin e zv/kryeministres Belinda Balluku.
Në këtë takim do të vijojë shqyrtimi i kërkesës së SPAK për të marrë autorizimin e Kuvendit për arrestimin e Belinda Ballukut.
“Me Urdhrin nr. 3, është thirrur mbledhja e Këshillit për Rregulloren, Mandatet dhe Imunitetin në datën 28 janar 2026, ora 12:00, në Kryesinë e Kuvendit, për vijimin e shqyrtimit procedural të kërkesës së Prokurorisë së Posaçme, që ka për objekt dhënien e autorizimit nga Kuvendi për arrestimin/heqjen e lirisë së zv/kryeministres Belinda Balluku”, njofton Peleshi.
Në mbledhjen e parë anëtarët e komisionit nuk arritën të nxirrnin një vendim lidhur me kërkesën e SPAK për arrestimin e Ballukut, ndërsa diskutimet u zhvilluan edhe me praninë e prokurorëve të çështjes dhe kreut të ri të Prokurorisë së Posaçme, Klodian Braho.
