Pas rritjes së fortë të pagave për të gjithë efektivët, Policia e Shtetit ka hapur aplikimet për pranimin e 400 efektivëve të rinj, të ndara sipas strukturave policore në nivel vendor.
Procesi i konkurimit do të jetë i drejtë, i paanshëm, transparent, si dhe sipas parimeve të shanseve të barabarta, mosdiskriminimit dhe meritës.
Bëhet me dije se 50% e kuotave për konkurrim do të jenë për shtetaset femra të cilat pas përfundimit me sukses të Kolegjit në Akademinë e Sigurisë, do të emërohen në strukturat e Kufirit dhe Migracionit. Aplikimet janë të hapura deri më datën 31 Korrik.
■ KRITERET PËR APLIKIM NË POLICINË E SHTETIT:
1) të jetë shtetas shqiptar;
2) të jetë jo më shumë se 30 vjeç;
3) të jetë me gjatësi jo më pak se 165 cm për meshkujt dhe jo më pak se 160 cm për femrat;
4) të ketë mbaruar arsimin e mesëm;
5) të mos jetë i përjashtuar nga Policia e Shtetit, strukturat e tjera të sigurisë kombëtare apo të jetë larguar nga shërbimi civil;
6) të jetë në gjendje të mirë shëndetësore dhe i aftë fizikisht për të kryer detyrën;
7) të mos jetë i dënuar me vendim gjykate, të formës së prerë, për kryerjen e një krimi apo për kryerjen e një kundërvajtjeje penale me dashje;
8) të ketë dëshmi të aftësisë së drejtimit të automjetit të tipit B;
9) të plotësojë kriteret e besueshmërisë dhe integritetit.
■ FAZAT QE KALOJNË APLIKANTËT PËR PRANIM:
Për pranimin në polici, aplikantët duhet të kalojnë me sukses sipas rendit zbritës fazat e mëposhtme:
a) aplikimi;
b) verifikimi dhe shqyrtimi i dokumentacionit;
c) verifikimi i besueshmërisë dhe integritetit të aplikantëve;
d) kontrolli shëndetësor;
e) testimi, i cili përfshin testin me shkrim, testin fizik, intervistën me gojë dhe testin psikologjik.
