Janë zbardhur detaje të reja nga mbledhja e grupit parlametar të PS-së e cila u zhvillua ditën e sotme me dyer të mbylluara, ndërkohë pas 5 orësh mësohet se mbledhja ka përfunduar dhe Edi Rama është larguar nga ambientet e Pallatit të Brigadave.
Mësohet se Kryeministri u ka kërkuar të vetëve që të jenë më aktivë në rrjetet sociale. Po ashtu mësohet se ai ka refuzuar të flasë për të larguarën së fundi nga Partia Socialiste Marjana Koçeku.
“Shok dhe shoqe do t’ju informoj në lidhje me një ish kolege”, mësohet të ketë thënë Balla. Në këto momente ka ndërhyrë Rama i cili ka kërkuar të mos vijonte me këtë çështje. “Lëre, po çfarë ish kolege”, është shprehur Rama.
Po ashtu ka pasur replika mes tij dhe Erion Braçes.
Edi Rama: “Ne nxjerrim një punë dhe nuk merr algoritëm. Nxjerr Erioni koshat e mbushur me mbeturina por nuk nxjerr koshat e pastra.”
Replika e Erion Braçes: “E bëj këtë gjë sepse nuk ka gjetur zgjidhje.”
Kujtojmë se edhe më parë gjatë mbledhjes të zhvillur ditën e sotme kryeministri Edi Rama ka thumbuar publikisht ish-ministren dhe një nga bashkëpunëtoret e tij më të ngushta në qeveri për disa vite, Elisa Spiropali, si dhe deputeten që ka dalë e pavarur ditët e fundit, Marjana Koçeku, duke i quajtur “shpirtra të humbur”.
