Anijet e Rojes Bregdetare italiane me në bord 12 emigrantët e marrë nga qendra e pritjes së Gjadrit u larguan drejt Barit, por ky nuk është fundi i diskutimeve mbi fatin e nismës së shumëlëvduar të qeverisë italiane. Të premten, Gjykata e Romës shfuqizoi urdhrat për mbajtjen e këtyre emigrantëve në qendrën e pritjes në Shqipëri dhe tha se ata kanë të drejtë të dërgohen në Itali.
Por autoritetet italiane e bënë të qartë menjëherë se do të ankohen ndaj vendimit. Kryeministrja Giorgia Meloni nuk tërhiqet, e mediat vendase thonë se javën që vjen, do të nisë një grup tjetër emigrantësh drejt Shqipërisë.
Ministri italian i drejtësisë, Carlo Nordio u shpreh se “ kjo është çështje që i takon politikës dhe nuk është përgjegjësi e magjistratëve”.
