Kryeministri Edi Rama ka lajmëruar se të dielën do të zhvillojë një takim në Selanik me shqiptarët e Greqisë. Takimi do të mbahet në 11:00 me orën lokale, në hotel “Porto Palace”.
“Pasnesër do të rikthehem me një kënaqësi krejt të posaçme tek shqiptarët e Greqisë, këtë herë në Selanik, ku historia na ka lidhur me njëmijë fije dhe e sotmja na bashkon më shumë se asnjëherë me fqinjët tanë jugorë, si dy popuj europianë që edhe për pak vite do jenë krah për krah në Bashkimin Europian”, shkruan Rama.
Ndërkohë, ministri i shtetit për Marrëdhëniet me Parlamentit, Taulant Balla, njoftoi se takimi me diasporën e Anglisë, i cili nuk u realizua në maj, do të ndodhë më 24 nëntor.
