Sot, më 12 tetor, Florjan Binaj mbush 40 vjeç. Aktori i njohur i humorit, i cili për vite u bë i dashur për publikun si “sozia e Ramës” në “Portokalli”, e gjen këtë ditëlindje në një tjetër skenë, atë politike.
Binaj është tashmë kandidat për Bashkinë e Tiranës, përballë Ogerta Manastirliut të Partisë Socialiste, dhe për rrjedhojë, në një garë të drejtpërdrejtë me vetë Edi Ramën.
Por pesë vite më parë, tabloja ishte krejt tjetër.
Në tetorin e vitit 2020, kryeministri Edi Rama i kushtonte një postim të gjatë ditëlindjes së aktorit, duke e përgëzuar publikisht me tone plot admirim.
“Florjan Binaj është një djalë king, me botë të bukur, i talentuar dhe i edukuar,” shkruante Rama në Facebook, duke shtuar se “Flori ka spikatur me sozinë time në shfaqjen më popullore e më kreative televizive sipas meje, ‘Portokallia’”.
Në fund të urimit, kryeministri e përfshinte në listën e artistëve që “e meritojnë t’u heqësh kapelen”.
Pesë vite më pas, po në të njëjtën datë, Florjan Binaj nuk është më “sozia gazmore”, por sfidanti politik i njeriut që dikur e vlerësonte publikisht.
Nga roli në skenë, në garën për pushtet, 40-vjetori i Binajt vjen si një kthesë e fortë mes dy botëve: artit që e bëri të njohur dhe politikës që e vendos sot përballë “shefit” që dikur e uronte.
