Kryeministri Edi Rama ka zhvilluar mbrëmjen tradicionale të fundvitit teksa mblodhi ministrat e kabinetit dhe përfaqësuesit e trupës diplomatike në Shqipëri.
Në këtë mbrëmje nuk kishte si të mungonte as ambasadorja amerikane në vendin tonë, Yuri Kim. Ndonëse gjatë ditëve të fundit po flitet për një “krisje” mes saj dhe kryeministrit, për shkak të zgjedhjes së kreut të ri të SPAK, në pamjet e publikuara shohim se ambasadorja Kim është pritur me përzemërsi dhe përqafime nga Edi Rama.
Më pas Yuri Kim është pozicionuar krah bashkëshortes së kryeministrit, Linda Ramës. Ndërkohë gjatë fjalës së tij në këtë darkë Rama ka renditur disa nga sukseset që Shqipëria ka arritur sipas tij në arenën ndërkombëtare, nga çelja e negociatave për anëtarësim në BE, te përfaqësimi në nivelet më të larta në OKB dhe organizimi i Samitit të BE-së në Tiranë.
