Thumana mirëpriti konferencën mbi sportin si motor zhvillimi. I pranishëm në aktivitet, kryeministri Edi Rama u ndal edhe te rindërtimi i Thumanës, pas shkatërrimit nga tërmeti i 26 nëntorit.
“Nuk besoj se do ta imagjinonte dot njeri që në ato ditët e tmerrshme, ku Thumana ishte epiqendra e tërmetit, në jo shumë vite më pas ne do mblidheshim këtu me kaq shumë kampionë dhe me praninë e gjithë federatave të sportit për të shfrytëzuar infrastrukturën e një mjedisi sportiv nga më të mirët në Shqipëri sa i përket mjediseve sportive komunitare”, tha Rama.
Kryeministri Edi Rama deklaroi se qeveria e tij nga sot ka prioritet kryesor “Lëvizjen sportive në shkolla”.
“Kemi vendosur gurin e themelit të lëvizjes sportive në shkolla. Kemi humbur jashtëzakonisht shumë kohë. Lëvizja sportive në shkolla nuk është për ata që do bëhen sportistë, por për shumë më tepër arsye, por është edhe baza për të nxjerrë talente ku nëse nuk e kamë mundësinë të stërviten nuk mund të evidentohen. Vitin e ardhshëm i kemi dhënë Komitetit Olimpik një tjetër ndihmë financiare për lëvizjen sportive në shkolla që kjo të mos jetë më një ngjarje, por traditë. Lëvizja sportive në shkolla është një prioritet kryesor për qeverine tone”, u shpreh Rama.
