Reshjet e shiut që kanë nisur prej ditës së shtunë kanë rritur ndjeshëm prurjet e përrenjve dhe lumenjve që furnizojnë Kaskadën e Drinit. Prurjet në Kaskadë, sipas Korporatës Elektroenergjitike Shqiptare arrijnë deri në 4 mijë metër/kub për sekondë.
Nivelet në Fierzë nuk shfaqen problematika. Aktualisht kuota është 270 metra, nga 296 metra që është maksimalja. Në Koman dhe Vaun e Dejës niveli i ujit ka mbërritur pranë kuotave maksimale.
Në Koman, niveli aktual është pranë 175 metrave, nga 175.5 metra që është kuota maksimale. Në Vaun e Dejës, kuota është pak centimetra larg 76 metrave, sa është kuota maksimale në këtë digë.
KESH ka marre vendimin drastik pasi ka nisur shkarkimet me 1300 metër/kub për sekondë në digën e Vaut të Dejës dhe për pasojë gjatë paradites është rritur niveli i ujit, ndërsa pasdite autoritetet kanë njoftuar normalizim të situatës. Ministri Peleshi dhe Spiropali ndodhen në terren ku kanë njoftuar se falë emergjencave civile dhe ushtrisë po ofrohet ndihmë në çdo familje që është prekur nga përmbytja.
