Kryeministri Edi Rama ka reaguar pas jehonës ndërkombëtare që mori ironia e tij me presidentin e Azerbajxhanit, Ilham Aliyev, dhe presidentin francez, Emmanuel Macron, për gafen e Donald Trump, i cili kishte ngatërruar Shqipërinë me Armeninë.
Sipas kryeministrit Edi Rama, ajo që ai tha për Trump në prani të Macron nuk ishte gjë tjetër veçse një moment humori i mirë.
Rama më tej vlerëson rolin e Presidentit Trump, duke theksuar se është një lider që i riktheu fjalës “paqe” rëndësinë në fjalorin e Perëndimit.
“Është me të vërtetë e jashtëzakonshme se si funksionon sot media dhe se si e ashtuquajtura “viralitet” mund të shtrembërojë kaq lehtë realitetin. Një fjali e thënë me humor, në frymë miqësie, papritmas shëndrrohet në titull ndërkombëtar të një samiti me dhjetëra vende, ndërkohë që gjithçka tjetër, thelbi i vërtetë, bëhet i parëndësishëm. Një shaka, një moment miqësor. Sigurisht, s’ka asnjë problem nëse përhapet, por ta shtrembërosh e ta kthesh në helm politik është thjesht e padrejtë. Prandaj le ta themi troç: E vërteta është që Presidenti Trump është treguar si një lider që riktheu fjalën ‘paqe’ në fjalorin e Perëndimit pas shumë vitesh”, shkruan Rama.
