Policia e Tiranës ka njoftuar se në rrugët e kryeqytetit do të ketë patrulla civile policie, të cilët të pajisur me radarë do të monitorojnë qarkullimin rrugor.
Policia Rrugore e Tiranës i bën thirrje shoferëve që të tregohen të përgjegjshëm dhe të respektojnë rregullat e qarkullimit rrugor. Patrullat e reja të policisë, civilë dhe të paevidentueshëm nga simbolet e policisë do të jenë në terren për të rritur sigurinë e qytetarëve.
“Me kujdesin më të madh për sigurinë e të gjithëve, ju njoftojmë se tani në rrugët e qytetit tonë patrullat civile janë të pranishme dhe të pajisura me radarë për të monitoruar dhe regjistruar çdo tejkalim të shpejtësisë. Nuk ka më vend për shkelje të rregullave të qarkullimit rrugor! Autopatrullat tona civile janë sytë që nuk fiksohen, veshët që nuk mbyllen, duke garantuar zbatimin e ligjit për një udhëtim të sigurt për të gjithë. Kujdes dhe përgjegjshmëri, kjo është mënyra si mbrojmë jetët në rrugët tona. Le të punojmë së bashku për një Tiranë më të sigurt!”, njofton policia.
