Ministrja e Infrastukturës, Belinda Balluku ka inspektuar sot mirëmbajtjen e aksit rrugor Burrel-Klos, aks që ka shfaqur problematika nga reshjet e shumta të shiut.
Balluku tha se aktualisht të gjitha akset rrugore në vend janë të kalueshme, megjithatë duhet kujdes për shkak të prezencës së ujit në disa zona.
“Intensiteti ka qenë shumë i lartë. Në zonën e Fierzës, aty ku ne prisnim të kishim rreshje të mëdha, ishin me intensitet mesatar. Akset janë të hapura. Në aeroportin e Rinasit kemi pasur disa devijime për të ruajtur pasagjerët nga rrufetë, jo nga shiu. Disa fluturime nuk janë ulur, janë kthyer në aeroportin e Brindisit për shkak të motit më të qetë atje. Mirëmbajtja dimërore nis në 15 dhjetor, ne sot kemi bërë një provë gjenerale për të parë se si funksionon i gjithë grupi, e gjithë skuadra. Ne kemi arritur tashmë përmes automjeteve moderne, të mbajmë akset hapur”, u shpreh Balluku.
