“Të gjithë makinat që parkohen gabim do të merren me karoatrec dhe do të zhvendosen e më pas do të bllokohen“.
Paralajmërimi i fortë për shoferët vjen ditën e sotme nga ministri i Brendshëm, Taulant Balla i cili tha se trafiku i rënduar në kryeqytet ka si burim kryesor edhe parkimet e gabuara, ndërsa theksoi se kësaj situate “duhet t’i jepet fund”.
“Ne duam mirëkuptimin e drejtuesve të mjeteve, se makina juaj e parkuar gabim është një problem shumë i madh për të tjerët, të cilëve u ke zënë rrugën, po ashtu dhe një karshillëk i madh ndaj Kodit Rrugor. Brenda pak ditësh çdo mjet i parkuar gabim do të largohet nga vendqëndrimi i gabuar me makineri të specializuar (karoatrec) të kontraktuar nga Policia Rrugore dhe do të bllokohet“, deklaroi Balla.
“Parkimeve të gabuara vend e pa vend, parkimeve dyshe, treshe mu në mes të rrugës, parkimeve mbi trotuar apo tek korsia e biçikletave etj., do duhet t’i jepet fund. Trafiku i rënduar në kryeqytet dhe në qytetet e tjera ka si burim kryesor edhe parkimet e gabuara, të cilat bllokojnë rrjedhshmërinë e trafikut”, perfundoi ministri Balla.
