“Mbi 500 mijë shqiptarë mund të buzëqeshin sot për fundin e një odiseje të gjatë 30 e kusur vite“, shprehet kryeministri Edi Rama, në një mesazh pas firmosjes së marrëveshjes mes Shqipërisë dhe Italisë për njohjen e pensioneve.
Nëpërmjet një video-mesazhi, Rama shprehet krenar për bilancin e qeverisjes socialiste në mbështetje të emigrantëve shqiptarëve, “të cilët gëzojnë të drejtën e njohjes së mundit e të djersës së tyre në 16 shtete”.
“Sot është një ditë e bukur për familjet shqiptare në Itali. Puna e tyre e ndershme, vitet e tyre të njëpasnjëshme në punë për të ndërtuar një ekonomi familjare me mund e me djersë, kontributi i tyre në ekonominë dhe në sigurimet shoqërore të vendit të dashur fqinj, nga sot do t’u kthehen në pensionet e tyre, secilit e secilës sipas asaj që u takon.
Për mua është një nga ato ditë fatlume, kur ndjenja e të qenit i vlefshëm për njerëzit e këtij vendi bëhet shumë e prekshme dhe e barazon me zero të gjithë peshën e rëndë të baltës së arenës politike e mediatike.
Kjo është një nga ato ditë kur them me plot gojën, hallall sharjet, akuzat, shpifjet, llafet e pafundme që nganjëherë bëhen aq shumë sa të vjen të thuash në dreq të gjitha!
Sot janë mbi 500 mijë shqiptarë që mund të buzëqeshin për fundin e një odiseje të gjatë tridhjetë e kusur vite. Sot është dita për ta mbyllur me një urim për të gjithë shqiptarët që punojnë në Itali: I gëzofshi pensionet tuaja!”, tha Rama ne mesazhin e tij.
