Ashtu siç e kishin paralajmëruar prej ditësh, është mbajtur sot protesta kombëtare në Tiranë, ku qytetarë, mes tyre studentë, gjimnazistë dhe prindër kanë protestuar për gati 3 orë para Ministrisë së Arsimit, ndërsa aktualisht janë zhvendosur para Kryeministrisë.
Ndryshe nga herët e tjera, protesta e sotme deri më tani është zhvilluar e qetë dhe mes palëve nuk ka pasur përplasje, e për rrjedhojë bëhet me dije se nuk ka pasur as shoqërime nga ana e policisë.
Me të njëjtat kërkesa, duke përfshirë arsimin, kostot e larta të jetesës, mbrojtjen e mjedisit e shumë fusha të tjera, qytetarët janë bërë sërish bashkë sot, për të 29-tën ditë, ndërsa e vetmja gjë që duket se ka ndryshuar është strategjia e tyre.
Nga hedhja e gurëve dhe tensioneve të ashpra që kanë nisur që nga dita e parë e protestës studentore që është mbajtur më 13 tetor, e deri në fundjavën që lamë pas, protestuesit sot janë parë më të qetë, duke marshuar nëpër kryeqytet teksa njëzëri brohorasin “Rama në burg, Berisha në burg”.
Në këto momente që raportojmë, janë bërë më shumë se tre orë nga grumbullimi i qytetarëve në Tiranë, ndërsa situata nuk paraqitet fare e tensionuar.
Ndryshe nga seç kanë bërë gjatë muajit tetor, ku qytetarë të shumtë grumbulloheshin çdo ditë duke kërkuar me këmbëngulje plotësimin e kërkesave të tyre që kryesoheshin nga ndryshimi i klasës politike, në vijim protestat do të mbahen vetëm në dy ditë të javës, çdo të mërkurë dhe të shtunë në orën 14:00 para Ministrisë së Arsimit.
Vendimi i protestuesve për të zhvilluar protesta në Tiranë dy herë në javë mendohet të jetë marrë në të mirën e studentëve, që këta të fundit të mos humbasin më orë mësimore.
