Të huajt po investojnë më së shumti në pasuri të paluajtshme në bregdetin e Vlorës, si apartamente, biznese apo vila përgjatë bregdetit. Përafërsisht kërkesa gjashtë muajt e fundit është rritur me 20%.
“Ka kërkesa për prona në Vlorë, në Lungomare, Uji i Ftohtë e deri në Radhimë. Kryesisht janë blerës nga Polonia, Ukraina por dhe Gjermania”, u shpreh një agjent imobiliar.
Kjo situatë shpjegon edhe çmimet gjithnjë në rritje të ndërtimeve të reja, duke e bërë të pamundur të gjesh një apartament në Vlorë me çmim nën 1600 euro metri katror. Ndërsa në zonën elitare tek Uji i Ftohtë çmimi shkon deri në 4000 euro metri katror.
Bazuar në të dhënat e Bankës së Shqipërisë, vitin e kaluar biznese dhe individë të huaj kanë investuar në Shqipëri më shumë se 1 miliard euro dhe afro 55% e totalit u përqendrua në pasuri të paluajtshme, industri nxjerrëse dhe aktivitete financiare.
