Të moshuarit po tërheqin, bashkë me pensionin edhe shpërblimin e fundvitit. Sipas grafikut që ka hartuar Instituti i Sigurimeve Shoqërore, për të mos pasur radhë në sportele, pensionistët dhe familjet me ndihmë ekonomike duhet të shkojnë ta tërheqin bonusin 50 mijë lekë te vjetra, ditën që u është caktuar për të marrë pensionin.
Pensionistët që nuk kanë mundësi ta tërheqin bonusin këtë muaj, kryesisht ata që jetojnë jashtë Shqipërisë, bëhet e ditur se “shpërblimi i fundvitit” skadon pas 36 muajsh. Po ashtu, qeveria bën me dije se shpërblimin e fundvitit do ta marrin edhe ata individë që dalin në pension, deri në datën 31 dhjetor.
Risi e këtij viti është bonusi për invalidët, në vlerën 60 mijë lekëve të vjetra. Fondi për shpërblimin e pensionistëve që nga viti 2021 është i garantuar në buxhet dhe nuk ka dyshime, si vitet e kaluara, kur qeveritë vendosnin në momentet e fundit nëse do ta jepnin apo jo.
