Plarent Ndreca, avokati i kryebashkiakut Erion Veliaj, ka qenë këtë të enjte në ambientet e spitalit të burgjeve dhe thotë se klienti i tij po mbahet i izoluar.
Sipas Ndrecës, pavarësisht se është avokat i kryebashkiakut, përgjigja e rezonancës dhe rezultatet e saj nuk i janë dhënë.
“Vazhdon të jetë në ambientet e spitalit, i izoluar. Nuk takon askënd, nuk flet me askënd, nuk del me grupe. Kur Veliaj ndodhet në ajrim mbyllen të gjitha qelitë sikur po del një personazh i rrezikshëm shoqëror”, tha Ndreca.
Ai theksoi se do të vijojë me kërkesat drejtuar institucioneve, veçanërisht Burgjeve, duke shtuar se mungesa e një përgjigje po sjell pasoja të drejtpërdrejta për shëndetin e kryebashkiakut Erion Veliaj.
“Që nga e shtuna unë nuk kam marrë një kopje të grafisë dhe rezonancës magnetike që të kem një mundësi ta konsultoj me mjekë specialistë dhe të marrim një vendim mbi ndërhyrjen kirurgjikale. Është një situatë që nuk di t’i jap shpjegim sesi një institucion shtetëror nuk i jep informacion vetë pacientit mbi çfarë doktorët kanë konstatuar.
Sot kam marrë një përgjigje që thjesht bën interpretim të rezonancës e grafisë, por nuk japin kopje. Është një persekutim shëndetësor i pakuptueshëm dhe nuk di si do të vijojmë me këtë mënyrë”, është shprehur avokati Plarent Ndreca.
